Sentsibilizazio-jardunaldia egin zuen Berdin-Berdinak elkarteak Arraunetxen azaroaren 30ean

Joan den azaroaren 30ean, larunbatarekin, sentsibilizazio-jardunaldia antolatu zuen Berdin-Berdinak elkarteak CAF Power enpresako langileekin.

Berdin-Berdinak-eko arraun-sekzioak bere goizeko entrenamendu-saioa egin zuen eta, berekin batera, CAF Power enpresako langile batzuk parte hartu zuten.

Adecco-ren ekimena

Sentsibilizazio-jardunaldia antolatzeko ideia Adecco fundazioarena izan da: Adeccok hainbat ekimen ditu martxan desgaitasuna duten pertsonak lan-munduan integratzeko eta horien artean kokatu dute ekimen hau ere. Oraindik oso zabalduta ez badago ere, enpresatan gero eta normalagoa da desgaitasunen bat daukaten langileak ere izatea eta Adecco-k aukera eman nahi zien langileei mundu hori gertuagotik ezagutzeko. Adeccoren gonbitari erantzunez etorri ziren Oriora CAF Power enpresakoak.

Enpatia lantzeko ariketa bat izan da CAF Power-eko langileentzat eta, bukaeran esan zutenez, oso lagungarria izan zaie kirol inklusiboaren filosofia eta ezaugarriak hobeto ulertzeko.

Entrenamendu bateratua

Berdin-Berdinak-eko neska-mutilek beren ohiko entrenamendua egin zuten eta, horrez gain, aparteko dinamika eta ariketa batzuk egin zituzten denok elkarrekin. Horrela, boluntario-lana egitera etorri zirenek jakin ahal izan zuten nola egin daitekeen ariketa fisikoa desgaitasunen bat izanda: itsutasuna eta bestelako ikusmen-arazoak, desgaitasun intelektuala…

Guztira 30 bat pertsonak parte hartu zuten jardunaldian: 20 bat elkarteko kirolariak ziren eta beste 10 bat Adeccok gonbidatutako boluntarioak. Giro ezin hobean aritu ziren batzuk eta besteak eta, bukaeran, aurten Orioko nesken traineruak Kontxan irabazitako banderarekin argazkia atera eta hamaiketako eder bat egin zuten Arraunetxen bertan.

burst

bty

bty

bdr

bty

bty

Martxa nordikoa egiten hasi dira Berdin-Berdinak elkarteko edadetuak

Berdin-Berdinak kirol inklusiboko elkarteak edadetuen talde bat dauka, astean bi saio egiten dituena: bat tatamian eta bestea igerilekuan. Taldea osatzen duten emakumeak jarduera berri bat ikasten hasi dira orain dela aste batzuk: martxa nordikoa.

Kiroldegitik kalera

Taldeko entrenatzaileen aholkuari jarraituz, kiroldegiko tatamitik kalera ateratzeko pausoa eman dute taldeko emakumeek eta, horretarako, martxa nordikoan trebatzea erabaki dute, beren ezaugarrietarako oso egokia da-eta. Martxa nordikoa bi makilaren laguntzaz egiten da eta horrek asko laguntzen die orekari eusten eta gorputzaren lan-karga hobeto banatzen.

Jardueraren helburua da martxa nordikoaren oinarriak ikastea eta taldea horretan trebatzea, gero beren kontura praktikatu ahal izan dezaten kalean.

Argazkiak itsasadarraren ertzean arratsaldez egindako paseoan atera zituen taldeak eta, ikusten denez, taldekideek ederki gozatu zuten ibilaldia.

Taldekideen iritzia

Orokorrean, oso gustura daude taldean jarduera berriarekin. Hau da taldekideek entrenatzaileei esan dietena:

• Lourdes: Makilak erabilita, denbora gehiagoz ibiltzeko aukera daukat, zangoko mina izan gabe. Laguntza handia da.
• María: Martxa nordikoa oso ondo etorri zait ziatikarako. Oso pozik nago bai jarduerarekin eta baita, orokorrean, taldekideekin eta begiraleekin ere.
• Nieves: Askoz arinago sentitzen naiz ibiltzeko, eta errazago mugitzen naiz. Oso jarduera ona iruditzen zait. Begiraleek pazientzia handia dute gurekin.
• Lourdes T: Oso gustura esperientziarekin. Makilekin denbora gehiago ibiltzen naiz eta ez zait bizkarreko mina jartzen. Besoak-eta askoz hobeto mugitzen ditut. Entrenatzaileek hamarra merezi dute.
• Toñi: Makilak oso ondo datoz koordinaziorako eta orekari eusteko. Oso ondo pasatzen dut klaseetan.
• María Jesus: Makilen kontu hau oso ondo etorri zait: segurtasuna ematen dit eta laguntza handia.
• Carmen: Klasean oso ondo pasatzen dugu eta begiraleek laguntza handia ematen digute. Primeran datorkit errekuperatzeko.

Elkarlanerako hitzarmena sinatu dute Orioko Udalak eta Berdin-Berdinak elkarteak

Azaroaren 15eko eguerdian sinatu dute hitzarmena Anuska Esnal alkateak eta Berdin-Berdinak elkarteko presidente Miren Salsamendik. Sinadura-ekitaldian ziren, baita ere, Kirol batzordearen buru Jose Angel Iparragirre, PSEko zinegotzi Ana Priede eta Berdin-Berdinak elkarteko zuzendaritza-taldeko kide Jabier Zabaleta.

Hitzarmena urtebetekoa da, baina urtez urte luzatu daiteke 2020ko abenduaren 31 arte; hau da, gehienez ere, lau urtez.

Hitzarmenaren arabera, Udalak 13.946 euro emango dizkio Berdin-Berdinak kirol inklusiboko elkarteari 2019an, bere urteko ekintzak finantzatzeko.

Kirol egiteko aukerak zabaltzeko helburuz

Orioko Udalak ahalegin handia egin du azken urteotan oriotar guztiei kirol egiteko aukerak zabaltzeko eta, ahalegin horren barruan, diruz lagundu izan ditu, besteak beste, Berdin-berdinak elkarteak herrian antolatzen dituen jarduerak, uste duelako elkarteak “ezinbesteko ahalegina egiten duela kirolaren mundura hurbiltzeko bestela horretarako aukera gutxi duten kolektiboak”.

Alicia Figueroak hitzaldia eman du Gipuzkoako kirol inklusiboaz, Mallorcan egindako Heziketa Fisikoko Nazioarteko Kongresuan

Alicia Figueroa Kirol Egokituko Gipuzkoako Federazioko zuzendari teknikoa da eta hitzaldi bat eman berri du Mallorcan, Heziketa Fisikoko 6. Nazioarteko Kongresuan: Experiencias y vivencias en el deporte inclusivo de Gipuzkoa. Kongresua Balearretako Unibertsitateak antolatu du, besteak beste, eta urriaren 23tik 25era egin da, Palman.

Berdin-Berdinak elkartearen esperientzia, hizpide

Aliciak Gipuzkoan kirol inklusiboaren alorrean martxan dauden ekimenak izan ditu hizpide eta aipamen berezia egin die Donostiako Hegalak kirol-zentroari eta Berdin-Berdinak kirol-elkarteari. Aliciak ederki ezagutzen du Berdin-Berdinak elkartea, Orion bizi delako eta hasieratik egon delako interesatuta eta inplikatuta elkartearen lanean. Proiektu erreferente gisa aurkeztu du Berdin-Berdinak elkartearen lana.

Urteroko surf-saioarekin hasi du denboraldia Berdin-Berdinak elkarteak

Abuztuaren 31n, larunbatarekin, denboraldi-hasierako surf-saioa egin dute Berdin-Berdinak elkarteko kide eta lagunek Antillako hondartzan, Orioko Surf Taldearekin batera antolatuta. Goizeko 10:30ean bilduta, aurrena uretan ibili dira eta, ondoren, hamaiketakoa egin dute malekoian, surfeko lokalaren aurrean.

Berdin-Berdinak elkarteko igerilariak Getaria-Zarautz itsas-zeharkaldian

Gure elkarteko Leyre eta Erika igerilariek parte hartu zuten uztailaren 21ean, igandearekin, aurtengo Getaria-Zarautz itsas-zeharkaldian. Zeharkaldiak tradizio handia du eta aurtengoa 49. edizioa izan da. Adin guztietako 3.100 igerilari inguruk parte hartu zuten, Euskal Herriko txoko guztietatik eta kanpotik etorritakoak.

Berdin-Berdinak elkarteko kirol-zuzendari eta igerilarien entrenatzaile Ana Godoyek idatzi du igandeko zeharkaldiaren kronika:

Arratsalde bat estropadetan

Uztailaren 13an Donostia Kaiarriba bandera jokatu zen Donostiako badiako uretan eta TKEko presidenteak Berdin-Berdinak elkartea gonbidatu zuen estropada ikustera agintarien itsasontzitik. Gonbita gustura onartu eta arratsalde ederra pasatu zuten gure taldeko ordezkariek arraunlari handiz eta arraunzale ugariz inguratuta.

Gure kirol-zuzendari Ana Godoyek kronika hunkitu hau idatzi du, han bizi izandakoa kontatzeko:

Gure presidenteak oso plan berezia prestatu zigun, ezustean, larunbaterako: Donostia Kaiarriba banderako estropadak ikustea agintarien itsasontzitik. Ustekabeko planak izaten dira ederrenak eta hau halakoxea izan zen. Bai ederki pasatu genuen!

TKEk erreportaje bat egin du orain dela gutxi gure taldeko arraun sekzioari buruz eta horrek eman zion ideia TKEko presidente Borja Rodrigori gure taldeko kide batzuk estropada ikustera gonbidatzeko.

Ikasturte bukaerako afaria egin dute edadekoen taldeko lagunek

Ekainaren 24an eman zion bukaera ikasturteari Berdin-Berdinak elkarteko edadekoen taldeak. Denboraldiko azken saioa egin ondoren, Orioko plazako Kolon Txiki tabernan bildu ziren bertako kideak, lagun giroan, taldeko arduradun teknikoekin eta elkartearen presidentearekin. Irailean hasiko dira ostera lanean, oporrak eta gero; baina, bitartean, mahaiaren bueltan ospatu nahi izan zuten aurten egindako lana. Argazkian ikusi daitekeen bezala, gustura egon ziren, patxadaz eta umorez.

Udalaren babesa

Edadekoen ariketa fisikoko taldea Udalaren babesean sortu zen eta berak ordaintzen ditu gastuak, neurri handi batean, zahartze aktiboa bultzatzeko programaren barruan. Sortu zenean bi lagunek parte hartzen zuten; baina, geroztik, taldea handitzen joan da etengabe.

Berdin-Berdinak elkarteko teknikariek amonen taldea esaten diote, maitasunez, gaur egun zortzi emakumez osatuta dago-eta; baina, nolanahi ere, talde irekia da eta aitonek ere badute parte hartzeko aukera 🙂